Malnourished nidaghan

CEBU, Philippines - Nisaka ang kaso sa mga bata nga malnourished sa Central Visayas sumala pa sa Regional Nutrition Council-7.

Matud sa pangulo sa RNC-7, Dr. Parolita Mission, nga dili alarming ang pagsaka apan nipahimangno nga dili mokompiyansa ug hingusgan gihapon ang kampanya sa good nutrition.

Gituohan nga ang pagkuso-kuso sa bagyo’ng Yolanda ang nakatampo sa pagsaka sa malnourished diin daghan ang naproblema sa pagkaon.

Base sa statistics, aduna’y unom matag usa ka gatos ka bata ang underweight base sa resulta sa 2014 Operation Timbang.

Dugang ni Mission ang mga lugar nga taas og kaso sa underweight mao ang Cebu gisundan sa Negros Oriental, Siquijor ug Bohol.

Aron pagtubag sa mao’ng problema, ang National Nutrition Council dunay giumol nga Philippine Plan of Action for Nutrition diin mao kini ang giya sa mga local government units aron ma-implementar ang mga programa may labot sa nutrition program. (BANAT NEWS)

Source: philstar.com - Balita