April 27, 2015
Kaduha nidaug sa Banat promo
CEBU, Philippines – Sukad pa niadto’ng tuig 2003 nga tigbasahan na og Banat News ang 56-anyos nga tourism officer sa lungsod sa Asturias nga si Era Rallos kinsa duha ka higayon nga nakadaug sa Banat News Trivia Challenge raffle promo.
Una’ng nabunutan si Rallos isip first prize winner niadto’ng Pebrero kanus-a nakadaug siya og P5,000 ug nausban niadto’ng Marso isip second prize winner ug nakadaug og P3,000.
Matud ni Rallos nga wala niya damha nga makadaug siya sa trivia challenge tungod kay daghan kaayo ang nisalmot.
“Bisan pa og wala’y trivia, Banat News gyud akong basahon tungod kay ganahan ko sa mga balita ug mga estorya sa Banat News gikan sa una’ng pahina hangtud sa katapusan mahurot gyud nako og basa,” ni Rallos pa.
Gikan sa Lunes hangtud sa Biyernes dunay suki si Rallos nga newsboy nga maghatud kaniya og kopya sa Banat News sa iya’ng opisina sa munisipyo.
“Ang ako lingaw-lingaw lang gud kay matag semana man ko moanha og Cebu mohapit lang ko sa buhatan sa The Freeman/Banat News aron mahatod nako ako’ng entry,” sumala pa niya. Gibutyag ni Rallos nga ang ubang kawani sa munisipyo nga nibasa sab og Banat News ang namalihug pagpadala sa ilang mga entries.
Ang general manager sa The Freeman/Banat News nga si Melandro Mendoza nipadayag sa iya’ng pasalamat sa mga ni-patronized sa Banat News.
Matud ni Mendoza nga ang paglusad og trivia challenge raffle promo sa Banat News usa sa pamaagi sa pasalamat ngadto sa mga bumabasa sa ilang padayung suporta.
Niadto’ng tuig 2005 gilusad ang trivia challenge ug subli’ng gilusad sa niagi’ng tuig atol sa ika-20 ka tuig sa Banat News.
Matud ni Mendoza nga ang grand draw sa trivia challenge ipahigayon sa ika-21 ka tuig nga anibersaryo sa Banat News karong Agosto ug ihunong na kini.
Apan ang mga Banat News readers dili angayang maguol tungod kay matud ni Mendoza maghunahuna na sab sila og laing promo nga ilusad nga posible’ng dako pa ang premyo. Gibutyag ni Mendoza nga sa nilabay’ng 10 ka tuig nisaka ngadto sa 200 porsiyento ang gidaghanon sa readers sa Banat News.
“Yu’ng increase natin sa readership nakita naman natin base sa sales natin nag-grow tayo more than 200 percent, kailangan talaga natin magpasalamat through promos,” dugang ni Mendoza. – /GMR) (BANAT NEWS)
Source: philstar.com - Balita
Monday, April 27, 2015 0
Minus ang deboto sa Kaplag
CEBU, Philippines – Dili kaayo daghan ang mga deboto ni Señor Sto. Niño nga nikuyog sa foot procession padulong sa fluvial procession isip kabahin sa kalihokan sa ika-450 ka tuig nga Kaplag Anniversary celebration kagahapon.
Gisugdan ang foot procession human sa misa nga gipahigayun sa National Shrine of Saint Joseph sa dakbayan sa Mandaue alas 4 kagahapon sa buntag.
Ang foot procession gisubay sa rota sa tinuig nga kalihukan atol sa Sinulog agi sa dalan Plaridel lahos sa Ouano Avenue hangtud na sa Ouano Wharf sa barangay Looc sa mao’ng dakbayan.
Si Senior Superintendent Petronelli Baldebrin, direktor sa Mandaue City Police Office (MCPO), mao ang nangulo sa pagpatuman sa kahapsay ug kalinaw kauban sa 100 niya ka sakop ug inabagan sa mga barangay tanod ug traffic enforcers.
Ang M/V Trinidad nga gipanag-iya sa pamilya’ng Ouano mao gihapon ang gihimo’ng galyon nga giluwanan sa imahen.
Kapin lang sa 30 ka bangka ang nikuyog sa fluvial procession nga mas minus sa naandan nga fluvial procession sa Sinulog.
Minus usab ang nanan-aw daplin sa Mactan Channel. – /GMR) (BANAT NEWS)
Source: philstar.com - Balita
Monday, April 27, 2015 0
Kaplag ipasaulog sa tanan
CEBU, Philippines – Giawhag ni Mayor Michael Rama ang mga pribado’ng establesemento nga tugtan ang ilang mga kawani nga makasalmot sa kalihukan sa ika-450 ka tuig pagsaulog sa Kaplag sa imahen ni Senior Santo Niño karong adlawa. Matud ni Rama nga gusto niya nga makaapil ang tanan nga business establishments ug tunghaan nga adunay summer classes nga kung mahimo tugutan sila nga mosalmot sa selebrasyon.
Dugang ni Rama nga abli ang City Hall apan dili pareho sa ordinaryo’ng mga adlaw kay buot niya nga makaapil sa selebrasyon ang tanan empleyado ilabi na ang mga Katoliko Romano.
“Not holiday but mostly holiday,” matud ni Rama. Gusto ni Rama nga hatagan og kahigayunan ang katawhan nga makaapil sa selebrasyon. – /GMR) (BANAT NEWS)
Source: philstar.com - Balita
Monday, April 27, 2015 0
Nangibot sa mga narra sa SRP gidakop
CEBU, Philippines- Duha ka trabahante sa usa ka construction company gidakop tungod sa pagpangibot og punoan sa Narra diha sa South Road Properties.
Ang gidakop ug gipaslak sa Mambaling Police Station mao sila si John Pable, 21, operator sa backhoe ug ang iyang kaubang si William Maata, 38, taga dakbayan sa Lapu-Lapu pulos mga sakop sa WT Construction Incorporated (WTCI).
Ang duha gidakop sa mga sakop sa Department of Environment and Natural Resources (DENR) ug representante sa Community Environment and Natural Resources Office (CENRO).
Sumala pa naaktohan silang nangibot og lima ka punoan sa kahoy nga Narra nga wala’y permit diha sa SRP sa habig sa Barangay Mambaling ning dakbayan.
Hangtud sa pagkutlo niining balita wala pa’y opisyal sa WT Construction ang mibisita sa duha, wala pa usab matino kun unsay buhaton sa duha sa maong mga punoan sa kahoy nga ilang gipangibot. (BANAT NEWS)
Source: philstar.com - Balita
Monday, April 27, 2015 0
Traffic enforcer padasmagan unta
CEBU, Philippines- Padasmagan unta ang traffic enforcer sa motorista nga buot niya’ng dakpon sa kalapasan sa lagda sa trapiko alas 8 pasado ang takna sa niagi’ng gabii apan nadakpan human sa ginukdanay.
Usa ka Vergil Caballero, 35-anyos, taga barangay Bonbon, dakbayan sa Sugbo, ang buot unta modasmag kang Edwin Ruiz, hingkod ug sakop sa Traffic Enforcement Agency of Mandaue (TEAM) nga nadestino sa Sotero B. Cabahug ug Soriano Avenue sa barangay Centro, dakbayan sa Mandaue.
Matud ni Police Officer 3 Jesson Flores nga nipadagan sa iya’ng motorsiklo si Caballero bisan stop signal hinungdan nga gisinyasan ni Ruiz sa pagpahunong.
Apan si Caballero giingong nipabulhot hinuon sa pagpadagan sa motorsiklo tumong sa pagdasmag kang Ruiz hinungdan nga nakaaghat sa mga kauban sa paggukod ug na-corner sa eskina Hernan Cortes sa barangay Subangdaku. (BANAT NEWS)
Source: philstar.com - Balita
Monday, April 27, 2015 0
April 26, 2015
Linog sa Nepal nipatay og dul-an 2 mil
CEBU, Philippines- Miabot na og dul-an dos mil ka tawo ang nakalas sa 7.8 magnitude nga linog nga miigo sa nasud sa Nepal niadtong Sabado. Ang linog nitumpag sa mga karaang buildings ug kabalayan ug naghatag og grabeng kalisang sa mga tawo nga nag-iyahay og panagan sa mga hawan.
Ang Kapitolyo sa Nepal, ang siyudad sa Kathmandu maoy grabeng naapektahan nga gisundan og usa ka magnitude 6.7 nga aftershock kagahapon sa hapon nga nakadugang sa kalisang sa mga tawo.
Nag-abot-abot na hinuon ang mga hinabang gikan sa nagkadaiyang mga kanasuran luwan sa mga abyon apil na ang mga doctors ug relief workers.
Ang base camp sa Mt. Everest adunay daghang mga langyaw nga buot mokatkat niini ang natabunan sa nidahili nga ice.
Ang maong linog maoy kinakusgang nasinati sa Nepal sud sa nakalabay nga 80 ka tuig, gani nabatyagan kini sa India, Bangladesh, China, Tibet ug Pakistan. Sumala pa sa report, 1,970 na ka tawo ang namatay, samtang gibanabanang miabot og lapas 5,000 ang naangol, apan gipanglantawang mosaka pa ang gidaghanon niini. Ang pinakakusog nga linog sa Nepal nahitabo niadtong 1934 nga may gikusgong magnitude 8.0 diin napatag ang tulo ka siyudad sa maong nasud nga mao ang Kathmandu, Bhaktapur ug Patan. (BANAT NEWS)
Source: philstar.com - Balita
Sunday, April 26, 2015 0
Tommy O. wa na g’yuy cancer
CEBU, Philippines- Ang mga doktor sa M.D. Anderson Cancer Center sa Houston, Texas mideklarar nga wala na g’yuy sakit nga cancer si kanhi kongresista Tomas R. Osmeña.
Si Osmeña subli nga nagpa-check up sa mao nga tambalanan sa miagi’ng semana aron sa pagsiguro sa kahimtang sa iyang panglawas ug nahinangop sa gipahibalo kaniya sa doktor.
Nagpatambal si Osmeña kaniadto’ng 2008 human nga ang iyang pantug nakasinati og cancer. Ang mga doktor miingon nga human sa paglabay sa unom ka tuig nga wala na g’yuy cancer si Osmeña, timailhan na kini nga hingpit na gayud nga nahanaw ang iyang sakit.
Gihugon-hugonan nga si Osmeña o kaha ang iyang asawa nga si Konsehal Margot Osmeña maoy moatbang ni Mayor Michael Rama sa pagpapili pagka mayor sa dakbayan sa Sugbo sa eleksyon karong sunod tuig. (BANAT NEWS)
Source: philstar.com - Balita
Sunday, April 26, 2015 0
Shabu, armas
CEBU, Philippines- Babayeng gipasanginlang drug pusher nasikop sa mga sakop sa Argao Police nga nakuhaan og daghang shabu ug duha ka mga armas sa Barangay Talaytay sa maong lungsod.
Ang dinakpan mao si Rosella Kintanar, 37, ug maoy target sa kapulisan ug gipasanginlang usa ka level 2 drug pusher.
Gidakop usab ang iyang sinaligan nga giingong tig-repack sa mga shabu nga si Jenifer Gelbolingo, 42, minyo nga taga Talaga, Argao.
Matud pa ni Senior Inspector Alejandro Batobalonos ang hepe sa Argao Police nga nahinabi sa Banat News tulo ka semana nilang gipanid-an si Kintanar.
Sumala pa ni Batobalonos, miundang na kaniadto sa maong negosyo si Kintanar ug namaligya na lang og barbecue apan nibalik sa ilegal nga negosyo.
Sa wala pa mihimo og operasyon ang kapulisan mihimo pa sila og test buy sa suspetsado ug napalitan kini og usa ka pakete hinungdan nga mikuha og search warrant ang kapolisan gikan ni RTC Judge Maximo Perez.
Sulod sa balay ni Kintanar narekober ang duha ka dagkong putos ug 20 ka gagmay putos pulos dunay sud nga gituohang shabu ug nagkantidad kini’g P119, 416.
Gawas sa mga shabu nasakmit ang usa ka .45 caliber pistol ug usa ka .22 rifle nga duna’y unom ka mga bala ug pulos kini walay lisensya.
Samtang nakuha sab gikan ni Gelbolingo ang duha ka gagmay’ng pakete sa gituohang shabu.
Sa laing bahin, usa ka Rodel Almonte Tamara,23, ang nadakpan sa Barangay Ibabao, Cordova sa grupo ni Senior Inspector Alexander Nuñez sa gihimo nilang buy-bust operation.
Matud pa ni Senior Police Officer 1 Laurencio Wagwag napalitan og usa ka gamay’ng paketeng shabu si Tamara.
Gawas niini, nakuhaan siya og dugang pang tulo ka gagmay nga pakete ug usa ka medium size nga ang tanan ilang gibanabana nga P50,000 ang kantidad niini.
Nasakmit usab nila gikan sa mao nilang dinakpan ang kalibre 45 nga armas nga uban sa usa ka magazine nga puno sa bala. (BANAT NEWS)
Source: philstar.com - Balita
Sunday, April 26, 2015 0
Pito ka tulisan ang mihimo
CEBU, Philippines- Moabot unom hangtod pito ka tawo ang nitulis sa My Gold Pawnshop sa dalan Colon ning dakbayan sa Sugbo niadtong adlaw nga Sabado nga milimas sa milyones nga kantidad sa mga alahas.
Ang kapulisan nagdudang ang maong grupo mao ang nitulis sa E-Bingo sa dakbayan sa Mandaue sa miaging buwan.
Si Chief Inspector David Señor ang hepe sa Theft and Robbery Section (TRS) sa Cebu City Police Office nga nahinabi sa Banat News may pagkaparehas og dagway ang nanulis sa pawnshop ug sa E-Bingo apan ilaha pa kining susihon pagbalik.
Gisubay nila karon ang kuha sa close circuit television (CCTV) sa mga lugar diin posibleng giagian sa grupo.
Nagtuo si Señor dili lang motorsiklo ang getaway vehicle sa mga tulisan. Una nang gitug-an sa presidente sa Cebu Bankers Association, Maximo Rey Eleccion nga posibleng ang pagpanulis sa Mandaue “dry run” lang sa mga tulisan alang sa mas dakong target.
Duna nay mga polis gikan sa Dumaguete City ang miabot aron mosusi kun mao ba gihapon kining grupoha ang nakaigo sa ilang siyudad.
Hangtod karon wala pa makahatag ang tag-iya kun pila gyud ang kantidad sa nawala nilang alahas. (BANAT NEWS)
Source: philstar.com - Balita
Sunday, April 26, 2015 0
Nangibot sa mga narra sa SRP gidakop
CEBU, Philippines- Duha ka trabahante sa usa ka construction company gidakop tungod sa pagpangibot og punoan sa Narra diha sa South Road Properties.
Ang gidakop ug gipaslak sa Mambaling Police Station mao sila si John Pable, 21, operator sa backhoe ug ang iyang kaubang si William Maata, 38, taga dakbayan sa Lapu-Lapu pulos mga sakop sa WT Construction Incorporated (WTCI).
Ang duha gidakop sa mga sakop sa Department of Environment and Natural Resources (DENR) ug representante sa Community Environment and Natural Resources Office (CENRO).
Sumala pa naaktohan silang nangibot og lima ka punoan sa kahoy nga Narra nga wala’y permit diha sa SRP sa habig sa Barangay Mambaling ning dakbayan.
Hangtud sa pagkutlo niining balita wala pa’y opisyal sa WT Construction ang mibisita sa duha, wala pa usab matino kun unsay buhaton sa duha sa maong mga punoan sa kahoy nga ilang gipangibot. (BANAT NEWS)
Source: philstar.com - Balita
Sunday, April 26, 2015 0
Mga barge nakahatag kadaot sa Naga?
CEBU, Philippines - Dul-an sa 20 ka dagko’ng barge ang midunggo karon sa kadagatan sa siyudad sa Naga habig sa reclamation area nga atubangan sa Naga City Hall.
Si Naga City Mayor Valdemar Chiong mihulagway nga nakahatag kini og dako’ng hulga sa marine life ug environmental impact ang pagdunggo sa daghang barge sa maong dapit.
Kini tungod kay sagad mokabat ngadto sa usa ka buwan ang pag-estar sa maong mga barge nga aduna’y karga nga anapog para isagol sa semento ug carbon nga gigamit pangsugnod sa power plant sa Kepco power plant sa semento.
Samtang nagpaabot sa ilang turno nga mohatod sa ilang produkto ngadto sa pantalan, ang mga barge anha mag-angkorahe sa mabaw’ng bahin sa kadagatan.
Matud ni Chiong nga makahatag kini og dako’ng kadaot sa kadagatan ilabi na nga dili kalikayan nga mangahulog ngadto sa dagat ang subra nga karga ingon man ang ilang hugaw sa barge.
Giklaro ni Chiong nga ang Cebu Port Authority (CPA) maoy adunay gahum sa pagbadlong sa mga tagdumala sa barge nga anaa sa kadagatan sa probinsya sa Sugbu.
Gilaraw ni Chiong ang posibilidad nga ilang kolektahan og bayad ang mga barge nga modunggo sa pantalan sa Naga isip ilang dugang kita sa siyudad.
Ang opisina ni Chiong wala pa hinuon makadawat og mga reklamo gikan sa mga mangingisda ug sa ubang mga tawo kabahin sa kadaot nga namugna sa kanunay’ng pag-estar sa daghang barge sa ilang dapit.
Paborito sa mga tagdumala sa barge ang pagdunggo duol sa reclamation area kay sayon ra ang pag-adto nila sa merkado aron makakumpra og ilang panginahanglanon. (BANAT NEWS)
Source: philstar.com - Balita
Sunday, April 26, 2015 0
Impounded vehicles ipagamit sa mga barangay
CEBU, Philippines - Ang 27 ka barangay sa dakbayan sa Mandaue maoy makapahimulos paggamit sa ma-impound nga mga sakyanan kun dili malukat sa mga tag-iya human sa paglabay sa usa ka semana.
Ang pagpangapod-apod sa mga sakyanan gibase sa pag-amendar sa Section 4 sa City Ordinance No. 12-2013-797 nga gitawag og Anti-Mobile Vending Ordinance of 2013.
Si Konsehal Jimmy Lumapas, tsirman sa committee on market sa konseho sa dakbayan nangamahan sa pag-usab sa Section 4 nga nag-ingong ang multa sa unang kalapasan P3,000 ug kinahanglang bayaran diha sa City Treasurer sulod lamang sa 24 oras.
Kun molapas sa 24 oras kinahanglang mobayad ang tag-iya og P5,000 nga multa.
Apan gidugang sa Section 4, kun molapas na gani og usa ka semana, embarguhon na kini pabor sa siyudad ug ubos sa discretionary power sa mayor mahimo niyang ipagamit sa mga barangay. (BANAT NEWS)
Source: philstar.com - Balita
Sunday, April 26, 2015 0
P3B target kolektahon sa Kapitolyo
CEBU, Philippines - Gipanglantawan sa lalawigan nga magahinan sila og P191.8 milyones nga Internal Revenue Allotment (IRA) matag buwan niining tuiga matud sa officer-in-charge (OIC) sa provincial treasurer office.
Si Emmanuel Guial nagkanayon nga sa milabay’ng tuig ang probinsiya P168.6 milyones lang ang IRA kada buwan.
Ang IRA sa 2014 miabot P2.438 bilyones mas taas og gamay sa P2.405 bilyones nilang target gikan sa koleksiyon sa buhis sa probinsiya.
Ang abot sa kagamhanan sa probinsiya ug sa mga lokal nga kagamhanan naggikan kini sa mga koleksiyon sa buhis diin lakip na niini ang real property tax (RPT), business tax ug collection fees sa mga pasilidad.
Sa milabay’ng tuig ang probinsiya duna kini P291 milyones nga surplus o savings ug mao karoy gigamit nga supplemental budget niining tuiga.
Target sa lalawigan nga makakolekta og P3 bilyones ug nakuha na nila ang 30 porsiyento niini niadtong Marso 30, 2015.
Sa 2014 Annual Investment Plan ang imprastraktura maoy kinadak-an og pundong nagamit P175 milyones gikan sa annual budget, supplemental ug realignment. (BANAT NEWS)
Source: philstar.com - Balita
Sunday, April 26, 2015 0
Minglanilla magtukod og international port
CEBU, Philippines - Ipatawag sa sunod buwan ang mga opisyales sa lungsod sa Minglanilla ngadto sa Cebu Port Authority (CPA) aron hisgutan ang mga polisiya niini alang sa pagtukod sa International Port diha sa Brgy. Tulay sa maong lungsod.
Kini gumikan kay posibleng sugdan na og trabaho kun mahuman na ang gihimong feasibility study niini ug sa pagtuon sa pagkuha sa gikusgon sa bawod ug hangin sa lugar aron pagsuta sa impact niini ngadto sa mga kasikbit nga lugar.
Hinuon way angay ikabalaka ang mga mananagat nga maapektohan sa proyekto tungod kay tabangan sila sa ilang panginabuhian sa lungsod ug makatrabaho sila sa pantalan kun magsugod na ang pagtukod niini.
Matud ni Minglanilla Municipal Administrator Concordio Mejias nga ang maong proyekto gipaagi sa Public Private Partnership (PPP) ug ang Primary Properties mao unya ang mo-develop nga mokantidad sa P10 bilyones.
Sumala pa makadawat ang Minglanilla og shares sa income sa pantalan lakip na ang CPA gikan sa mga collection fees.
Giklaro ni Mejias nga niagi sa saktong proseso ang ilang pagtukod sa international port. Apil sa gilihok mao ang environmental impact niini sa area ug sa mga residente.
Matud pang Mejias, dako ang kahigayonang mamahimong siyudad ang Minglanilla kun mahuman ang pantalan kay makahatag man kini og dugang trabaho, mosaka ang populasyon ug ingon man ang kitaon sa lungsod tungod sa economic activities nga maoy rekisitos sa balaod nga buot mamahimong syudad. (BANAT NEWS)
Source: philstar.com - Balita
Sunday, April 26, 2015 0
Anugon kaayo ang mga shells craft
CEBU, Philippines - Naugdaw ang usa ka shells craft shop sa Sitio Tabok-Lamac, Barangay Yati, Liloan nga nasunog sayo kagahapon sa buntag ug nagbilin kini og P200 mil nga danyos.
Matud ni fire investigator Bob Bola-bola nga may mga nakakita nga adunay mikidlap sulod sa shop mga alas 6:20 sa buntag ug taud-taud miulbo dayon ang sunog.
Dali nga mirespondi ang kabomberohan apan nakasinati sila og gamay nga kalisod pagsulod sa nasunogan kay gamay kaayo ang karsada. Wala hinuon makakaylap ang sunog kay ang shop gilibotan og tag-as nga kural nga semento.
Nakontrolar sa kabomberohan ang kayo mga 10 minutos human sila makasugod sa pagpasirit sa tubig.
Base sa imbestigasyon nasayran nga ang shop gipanag-iya ni Dionesio Balbutin, usa ka exporter og mga shells craft.
Nasuta nga ang sunog didto nagsugod sa circuit breaker sulod sa working area diha nga ang alambre sa breaker nga may sinumpayan nilugak na ug mi-spark ug nakapasilaob sa “flammable liquid waste” nga diha gibutang sa duol. (BANAT NEWS)
Source: philstar.com - Balita
Sunday, April 26, 2015 0
Kanhi OFW nasakmitan og armas sa checkpoint
CEBU, Philippines - Gidakop sa kapolisan ang usa ka lalaki nga kanhi Overseas Foreign Worker (OFW) human siya masakmiti og kalibre 45 nga pistola pag-agi niya sa gipahigayon nga checkpoint didto sa Consolacion kaniadto’ng Biyernes sa gabii.
Si PO1 Victor Largo sa Liloan Police Station miila sa nadakpan nga mao si Rolito Apas, minyo nga taga Sitio Curva, Barangay San Vicente, Liloan. Wala kini makapakita’g lisensya sa iyang armas.
Matud ni PO1 Largo nga ang team sa kapolisan nga gipangulohan sa ilang deputy chief nga si Inspector Fermin Doque nagpahigayon og checkpoint sa dalan national sa Barangay Pitogo, Consolacion, duol sa utlanan sa Liloan.
Si Apas gipara sa mga polis samtang nagsakay kini og motorsiklo nga wala magsul-ob og crash helmet. Si PO1 Jenvir Punay misita ni Apas ug nangayo sa iyang lisensiya ug rehistro sa gidala nga motorsiklo apan maoy ilang namatikdan nga may giluklok kini nga armas mao nga ilang gidakop. (BANAT NEWS)
Source: philstar.com - Balita
Sunday, April 26, 2015 0
Kalampusan batok sa ilegal nga drugas
CEBU, Philippines - Usa ka gituohang drug pusher ug usa ka laing lalaki ang nadakpan sa kapolisan didto sa Barangay Banilad kaniadto’ng miagi’ng gabii.
Ang kapolisan mironda sa balay sa dinakpan pinasikad sa search warrant nga gi-isyu ni RTC Branch 19 Judge Wilfredo Fiel Navarro sa dakbayan sa Sugbo.
Ang subject sa search warrant mao si Jessa Gador, 46, nga taga Sitio Iba-an, Banilad samtang naabtan sa kapolisan didto sa panimalay ni Gador mao si Alex Dexter Colina, 22, hinungdan nga giapil kini pagdakop.
Nakuhaan si Gador og usa ka gamay’ng putos shabu ug siyam ka pakete nga aduna gihapo’y sulod nga gituohang shabu ingon man mga drug paraphernalia.
Si Colina giapil sa pagrekisa ug nakuhaan usab og usa ka gamay nga pakete sa gituohang shabu.
Dugay na nga gipanid-an sa kapolisan si Gador human sila makadawat og report nga nalambigit kini pagpamaligya og shabu. Diha nga nakonpirmar na nila nga namaligya kini og shabu gi-aplayan dayon nila og search warrant aron maronda ang iyang gipuy-an.
Ang duha ka dinakpan wala mosukol diha nga gidala sila sa Mabolo Police Station ug giandaman na og kaso.
Sa laing bahin, ang kapolisan mihimo og buwag nga operasyon kaniadto’ng Martes sa hapon didto sa Sitio Kalingking, Barangay Saavedra, Moalboal.
Ilang nasakmit gikan sa duha ka barung-barong ang pipila ka tanom nga marijuana, usa ka guba nga 38 kalibre nga revolver nga walay serial number, 26 ka bala sa mao nga kalibre, lima ka bala sa kalibre 45 ug mga pakete sa shabu.
Matud ni Senior Inspector Edgar Labe, hepe sa Moalboal Police Station, nga adunay nitawag kanila og nireport sa ilegal nga kalihukan nga gihimo didto sa mao nga barung-barong.
Padayon pa ang imbestigasyon aron madakpan ang mga tag-iya sa gidili’ng matang sa drugas. (BANAT NEWS)
Source: philstar.com - Balita
Sunday, April 26, 2015 0
GMA Network nanaktak og kawani
CEBU, Philippines - Dise-sayes ka mga kawani sa GMA Network lakip ang upat ka inilang reporters ug cameramen ug producers ang naapektahan sa gipatumang retrenchment sa network ug dili na patrabahuon sugod karong Lunes.
Sumala pa nga ang mga natangtang naglakip sa upat ka reporters, lima ka video journalists (cameramen), usa ka sakop sa engineering maintenance, usa ka studio remote operation ug segment producer, executive producer, associate producer, junior news desk ug librarian.
Sumala pa sa pamahayag nga giluwatan sa GMA Network , anaa sila karon sa proseso sa paghapsay sa mga programa ug sa mga empleyado sa ilang regional stations aron masiguro ang business competitiveness sa kompanya. Hinuon, ang network mipasalig nga aduna’y mga benepisyong madawat ang mga maapektohang empleyado.
Nasayran nga dili lang ang Sugbo ang naapektahan tungod kay ang mga regional offices niini sa Cagayan de Oro City, Bacolod City, Naga City ug Ilocos apil sa gisirado, samtang ang tanang morning shows sa regional offices sa Cebu ug Davao giwagtang.
Base sa nakuhang impormasyon sa Banat News, naglakip sa mga gitangtang mao sila si Greggy Magdadaro, Bexmie Jumao-as, ang beteranong reporter nga si Jun Veligaño, Mark Anthony Bautista, segment producer nga si Jessie Campos. Ang GMA network nagkanayon ilang gikalipay ang serbisyo sa mga empleyadong naapektahan ug nanghinaot silang makakita sila og bag-ong oportunidad gawas sa ilang network.
Usa sa mga naapektahan niini mao ang reporter nga si Mark Anthony Bautista kinsa nagsugod og trabaho sa maong estasyon niadto pang tuig 2006 sa entertainment department una pa nasud sa Balitang Bisdak ug Buena Mano Balita niadtong 2008.
“Nahiubos lang ko tungod kay despite our efforts nga makatabang pag-rate sa amoang program, but kuwang pa diay nila ang na-contribute namo sa GMA 7,” matud pa ni Bautista.
Si Bautista nga nakahinabi sa Banat News/The Freeman nagkanayon iyang damgo ang mamahimong tv reporter ug sa GMA-7 niya kini natagamtaman.
Matud niya, ang rason sa pagtangtang kanila mao ang redundancy ug ang pagtangtang sa programang diin siya nasakop tungod kay wala na mo-rate.
Samtang mikwestyon siya karon kun hain na ang Manila-based nila nga union diin siya nahisakop tungod kay matud niya, wala sila matabangi niini karon. (BANAT NEWS)
Source: philstar.com - Balita
Sunday, April 26, 2015 0
Manghawod sa klase pahatagan og insentibo
CEBU, Philippines - Aduna’y tinguha nga mohatag og cash incentives ang dakbayan ngadto sa Top 3 Most Outstanding Student sa elementarya ug high school sa dakbayan sa Sugbo. Ang Cebu City Federation of Parents, Teachers Associations midangop kang Konsehal Alvin Dizon chairman sa Committee on Education sa pagsugyot sa konseho magbuhat og ordinansa kalabot sa paghatag og insentibo sa mga tinun-ang nanghawod sa ilang klase.
Nihangyo ang PTA og P3.2 milyones nga pahatagan og cash incentives ang valedictorian ug P5mil, salutatorian P3 mil, 1st honorable mention P2 mil, samtang sa regular class ang first honors makadawat og P5 mil, second honors P3 mil, third honors P2 mil ug 4th ngadto 10th honors P500. Adunay 137 ka publikong tunghaan sa elementarya ug high school ang dakbayan sa Sugbo nga maoy makabenepisyo kun kini maaprobahan sa konseho.
Unang nipasar sa konseho ang paghatag og cash incentives sa mga city scholars kun diin makadawat og P20 mil ang summa cum laude, P15 mil sa magna cum laude ug P10 mil sa cum laude. (BANAT NEWS)
Source: philstar.com - Balita
Sunday, April 26, 2015 0
Mga barge nakahatag kadaot sa Naga?
CEBU, Philippines - Dul-an sa 20 ka dagko’ng barge ang midunggo karon sa kadagatan sa siyudad sa Naga habig sa reclamation area nga atubangan sa Naga City Hall.
Si Naga City Mayor Valdemar Chiong mihulagway nga nakahatag kini og dako’ng hulga sa marine life ug environmental impact ang pagdunggo sa daghang barge sa maong dapit.
Kini tungod kay sagad mokabat ngadto sa usa ka buwan ang pag-estar sa maong mga barge nga aduna’y karga nga anapog para isagol sa semento ug carbon nga gigamit pangsugnod sa power plant sa Kepco power plant sa semento.
Samtang nagpaabot sa ilang turno nga mohatod sa ilang produkto ngadto sa pantalan, ang mga barge anha mag-angkorahe sa mabaw’ng bahin sa kadagatan.
Matud ni Chiong nga makahatag kini og dako’ng kadaot sa kadagatan ilabi na nga dili kalikayan nga mangahulog ngadto sa dagat ang subra nga karga ingon man ang ilang hugaw sa barge.
Giklaro ni Chiong nga ang Cebu Port Authority (CPA) maoy adunay gahum sa pagbadlong sa mga tagdumala sa barge nga anaa sa kadagatan sa probinsya sa Sugbu.
Gilaraw ni Chiong ang posibilidad nga ilang kolektahan og bayad ang mga barge nga modunggo sa pantalan sa Naga isip ilang dugang kita sa siyudad.
Ang opisina ni Chiong wala pa hinuon makadawat og mga reklamo gikan sa mga mangingisda ug sa ubang mga tawo kabahin sa kadaot nga namugna sa kanunay’ng pag-estar sa daghang barge sa ilang dapit.
Paborito sa mga tagdumala sa barge ang pagdunggo duol sa reclamation area kay sayon ra ang pag-adto nila sa merkado aron makakumpra og ilang panginahanglanon. (BANAT NEWS)
Source: philstar.com - Balita
Sunday, April 26, 2015 0
