Impounded vehicles ipagamit sa mga barangay

CEBU, Philippines - Ang 27 ka barangay sa dakbayan sa Mandaue maoy makapahimulos paggamit sa ma-impound nga mga sakyanan kun dili malukat sa mga tag-iya human sa paglabay sa usa ka semana.

Ang pagpangapod-apod sa mga sakyanan gibase sa pag-amendar sa Section 4 sa City Ordinance No. 12-2013-797 nga gitawag og Anti-Mobile Vending Ordinance of 2013.

Si Konsehal Jimmy Lumapas, tsirman sa committee on market sa konseho sa dakbayan nangamahan sa pag-usab sa Section 4 nga nag-ingong ang multa sa unang kalapasan P3,000 ug kinahanglang bayaran diha sa City Treasurer sulod lamang sa 24 oras.

Kun molapas sa 24 oras kinahanglang mobayad ang tag-iya og P5,000 nga multa.

Apan gidugang sa Section 4, kun molapas na gani og usa ka semana, embarguhon na kini pabor sa siyudad ug ubos sa discretionary power sa mayor mahimo niyang ipagamit sa mga barangay. (BANAT NEWS)

Source: philstar.com - Balita