Hubog nangamang nasakpan

CEBU, Philippines - Nagtingkagol sa prisohan ang 32-anyos nga lalaki kinsa gipasanginlan ug nasakpan sa akto nga nisuway na paghubo sa short pants sa 16-anyos nga babaye nga natulog sulod sa panimalay.

Ang insidente nahitabo pasado alas 4 sa nakalabay nga kaadlawon sa lungsod sa Argao.

Ang suspek naila nga si Lorenzo Magbanua, dunay kapuyo samtang ang reklamante nagtrabaho isip katabang sa panimalay nga nahimutang duol sa balay sa suspek.

Matud ni Police Officer 2 Renato Nacaytuna sa Argao Police Station nga ang 16-anyos nga natulog sa sala nakabantay nga may tawo nga nisuway paghubo sa iya’ng short pants.

Imbis nga modagan palayo ang suspek, matud pa nga kalma lang kaayo nga niingon nga “ayaw og saba” hinungdan nga dali nitawag ang dalagita sa iya’ng agawon ug nasakpan ang suspek.

Ang suspek igo lang sab niingon nga andam siya motahan sa barangay hinungdan nga ang taga barangay na ang nitawag sa kapolisan ug gisikop.

Sigun pa ni Nacaytuna nga wala nagmahay ang suspek diha’ng gipaslak na sa karsel sa Argao Police Station ug igo lang niingon nga kadto iya lang nabuhat tungod kay siya hubog.

Apan si Nacaytuna nagduda nga plano na sa suspek nga kamangon ang dalagita kay bisan sirado ang balay nakahimo pa kini sa pagsulod.

Gipasakaan og kaso’ng acts of lasciviousness ang suspek kagahapong adlawa samtang niangkon sa krimen.

“Ingon siya nga iya daw angkonon ang hitabo para makagawas ra daw siya dayon, kalma ra kaayo,” sigun pa ni Nacaytuna. (BANAT NEWS)

Source: philstar.com - Balita