Hi-tech traffic lights ibutang sa Minglaniila

CEBU, Philippines - Dili mominus sa P12 milyones ang gigahin sa kagamhanan sa Minglanilla alang sa pagpamalit og mga traffic lights nga ipangtaud sa mga intersection sama sa Lipata, Poblacion ug Sangi.

Matud ni Minglanilla Mayor Elanito Peña nga high-tech ug digital ang mao’ng mga traffic lights nga may close circuit television (CCTV) camera.

Gawas nga makatabang sa pagpahapsay sa dagan sa trapiko, ang moderno’ng traffic lights makatabang usab sa pagsumpo sa krimen.

Gisugdan na pag-istalar ang mga traffic lights ug gibanabana nga mahuman sa dili pa ang Hunyo nga magdasok na usab ang mga tinun-an.

Himuong command center ang karaan nga merkado alang sa monitoring sa kahimtang sa trapiko sa Minglanilla ilabi na sa highway.

Sa karaan nga merkado usab ibalhin ang Police ug Fire Stations.

Gipasabot ni Peña nga nagkadaghan na karon ang volume sa mga sakyanan nga motadlas sa kadalanan sa Minglanilla gumikan sa nagkadaku nga populasyon sa lungsod ug kapin na sa 50 ka developers sa subdivision ang nitukod ug ang pag-abot sa mga commercial establishments. (BANAT NEWS)

Source: philstar.com - Balita