Babaye sa Ormoc gipusil tungod sa love triangle

ORMOC CITY- Angulong may kalabutan sa gugma ang tinubdan sa pagpamusil sa usa ka dalaga didto sa dalan Bonifacio corner Carlos Tan ning dakbayan ganihang alas 7 pasado sa buntag (April 25, 2014).

Matod ni P/Cinsp. Ibrahim Jambiran, hepe sa Police Station 1, nga love triangle ang gitutokan nila nga motibo sa maong pagpamusil nga mibiktima sa usa ka dalaga nga gitago nato sa pangan nga Nicole, usa ka midwife.

Sumala ni Jambiran nga ang uyab ni Nicole dunay naunang uyab nga gitago nato sa pangan nga si Monica diin miabot na og unom ka tuig ilang relasyon, posibli nga sa kasuko ni Monica nagsugo kini og taw nga mo pusil kang Nicole.

Alas 7:40 ganihang buntag, giingong padung na unta sa trabaho si Nicole sakay sa iyang motorsiklo apan dakong kakurat sa mga bystander sa dihang mi syagit kini, natumba ang motorsiklo ug midagan paingon sa usa ka kan-anan samtang naka angkon kini og samad pinusilan.

Nakit-an didto sa crime scene ang usa ka kabhang sa gituhoang kalibre .45 ug ang tinagsik sa dugo sa biktima.

Gidala sa tambalanan si Nicole ug luwas naman kini sa kamatayon.

Matod sa usa ka bystander nga, criminals riding in tandem ang mipusil kang Nicole kinsa nagsakay og motorsiklo nga way plaka.

“nag bunit man to ang mipusil, nakurat ko kay nisyagit man unya natumba ang motor unya mao naman lay akong nabatian ang buto unya samdan na siya (Nicole)” matod sa bystander nga nagdumili sa pagbutyag sa pangan.

Dugang pa ni Jambiran nga, ang uyab ni Nicole biktima usab sa pagpamusil didto sa barangay Can-adieng niadtong milabayng buwan apan luwas kini.

Nasayran sa kapulisan nga sa una pa nahitabo ang pagpamusil, nakadawat na og hulga pinaagi sa text si Nicole ug ang lalaki, giimbistigaran sa kapulisan si Monica apan nihimkak kini nga iya ang mga mesahe sa pagpanghulga.

Mihimo naman og follow-up operation ang kapulisan alang sa pagsikop sa mga mamumuno. By: JKP89/Power 90.3 FM Ormoc