Barado nga kanal sa Cogon, Ormoc. Gireklamo

ORMOC CITY- Gireklamo sa pipila ka mga residente nga naa pa namuyo sa purok rosal sa barangay Cogon ning dakbayan ang barado nilang kanal.

Sa pagbisita sa Power 90.3 FM Newsteam, nakita nga tungod sa mga baras ug bato nga giabuno sa kagamhanan ang hinungdan nga wa na maka lahos ang dagan sa tubig inubanan pa kini sa mga basura.

Matod pa ni Arnel, usa sa mga residente nga taud taud na nga giabuno ang yuta ug bato nga gisakay gikan sa mga dump truck. 

Tungod niini, nabalaka karon ang mga residente tungod sa kadaghan sa mga lamok nga nanimuyo sa nagpundong tubig nga maoy hinungdan sa makamatay nga dengue.

Nasayran gikan sa mga taw sa maong dapit nga duna pay pipila ka pamilya nga wala pa mamalhin sa mga bunkhouse didto sa barangay Can-untog ug Concepcion.

Na problema usab ang mga naa pa karon nagpabilin hilabi na sa ilang pagpangatog, kay matod pa, mura sila og gihimong "sumsoman" sa mga lamok.

Nasayran nga, wa kini sila mamahawa gumikan kay wa silay kabutangan sa ilang mga gamit, mao na nga nia gihapon sila nagpabilin sa lugar kung diin gipalibotan sila sa mga ginuba nga kabalayan.

Ang purok rosal ug dahlia sa barangay Cogon maoy prayoridad sa kagamhanan ning dakbayan nga maka puyo sa mga bunkhouse sud sa 6 ka buwan ug human niini ibalhin na kini sila sa permanenteng kapuy-an didto sa barangay Liloan. 

Si Mayor Edward Codilla nipasabot nga gamiton na sa kagamhanan ang yuta sa purok rosal ug dahlia nga gitukoran og kabalayan sa mga informal settlers sud sa dugay ng katuigan.

Dugang sa mayor nga tukoran kini og mga edpisyo sa kagamhanan.

Ang mga residente nga naa pa karon nanimuyo, niingon nga basin og ang giabunong yuta timailhan na nga sugdan na sa kagamhanan ang pagtukod sa edepisyo. By: JKP89/Power 90.3 FM

PHOTOS: mga kabalayan sa purok rosal sa barangay Cogon nga giguba sa mga nanimuyo niini kaniadto nga toa na nibalhin sa mga bunkhouse pipila ka semana na ang nakalabay; Makita ang nagpundo nga tubig nga gipuy-an sa mga lamok.