Pawnshop gitulis

CEBU, Philippines - Usa ka pawnshop sa dalan Colon, Cebu City ang gitulis sa mga armadong lalaki sayo kagahapon sa buntag.

Si Senior Superintendent Marciano Batiancila, officer-in-charge sa Cebu City Police Office miingon nga pasado alas-8 dihang nangabli ang My Gold Pawnshop apan nakigdungan og sulod ang mga tulisan.

Matud pa niya nga tulo ang misulod apan dunay usa nga nagpabilin sa gawas ug maoy mibalik og sirado sa roll-up door. Gikatahong gipahapa dayon sa mga tulisan ang gwardya ug gidisarmahan.

Tungod kay nabatasan sa maong pawnshop nga ablihan ang vault sayo sa buntag aron kuhaon ang mga alahas nga angay i-display sa estante nakahigayon ang mga tulisan sa pagsakiyo sa tanang naa sa sulod niini nga gituohang mokabat og minilyon ka pesos.

Matud pa kalma ra kaayo migawas ang mga tulisan human gibaharan ang naa sa sulod sa dili pagtingog. Matud pa, diha sa gawas sa usa sa mga tulisan ang miingon “ayaw na lang og sirad-i” apan ang usa mitubag pa og “ato ning sirad-an kay walay tawo.”

Gikandadohan sa mga tulisan ang pawnshop ug nahibulong na lang ang tupad niini nga establisamento nganong naghinilakay na ang naa sa sulod.

Daling mitawag og polis ang naa sa kilid ug didto ilang giligwatan og tubo ang kandado aron maablihan ang mga empleyado nga naa sa sulod.

Matud pa sa tiggama og stamps nga naa sa kilid sa pawnshop nga iyang nabantayan nga may usa ka motor nga unang niabot.

Sunod niining nakita nga dunay kaestorya sa cellphone ang lalaki ug miingon “dugaya ninyo” ug dangtan pila ka minutos laing motor ang miabot ug misulod na ang tulo ka tulisan.

Matud pa niya nga samtang naa sa sulod ang tulo daw wa mahimutang ang lalaki sa gawas ug may gitaptap kini sa plate number sa motor ug sa dihang nakagawas na ang mga kauban mipasirit sila pagdagan padulong sa Pari-an ngadto na sa MJ Cuenco.

Sumala pa ni Batiancela nga ila karong gisusi kun ang maong mga tulisan mao ang miigo sa E-Bingo sa Mandaue City usa ka bulan na ang nakalabay , ang maong grupo mao ra poy niigo sa usa ka establisamento sa Dumaguete. Nasayran usab ni Batiancela nga ang gwardya wala makahimo sa iyang trabaho kay gipalimpyo sa establisamento.

Giawhag ni Batiancela ang mga tag-iya og negosyo dili himuong mga janitor ang ilang gwardya.

(BANAT NEWS)

Source: philstar.com - Balita