Hepe sa Ormoc CSU nangulata, nanion og pistola

ORMOC CITY- Gireklamo ang hepe sa Civil Security Unit (CSU) ning dakbayan nga si Gerry Seledio kahuman kini mangulata ug duha ka lalake ug nanagpa og duha ka babaye.

Usa sa upat ka mga biktima ang gipa um-om pa sa wa matinong kalibre sa pistola ug gipugos pag dala ug gi detain sa opisina sa CSU sa daan nga city hall.

Ang mga biktima mao sila si Landy Pamador, taga Kananga; Fernando Panta, usa ka CSU; Julieta Tauban, LGU utility sa city stage comfort room ug si Gelma Perez, tinun-an sa Sto. Nino College.

Ang biktima nga si Pamador naabot sa dakbayan kay nangita og trabaho ug sa city stage natulog kay walay kabanay ning dakbayan

Matod ni Pamador, alas 2:30 ganihang kadlawon samtang siya natulog sa city stage kalit kini nga gipukaw ni Seledio ug mga batos kay pakanaugon.

"Wa dayun ko monaog kay gialimungawan pa ko, lami na gud to ako tulog" matod ni Pamador.

Sa kalit lang, gibanyakan ang dughan ni Pamador ug gipa um-om pa sa wa matino nga kalibre sa pistola.

"gibanyakan akong dughan, unya gikumot akong buhok unya iyang gipakaon nako ang sumbohan sa pistola" matod ni Pamador.

Saksi usab si Pamador sa dihang gisagpa ni Seledio ang biktima nga si Perez sa unahan nga bahin sa iyang nahimutangan.

"Gibadlong to niya kay saba daw ang motor unya giingnan to siya sa babaye nga unsa diay problema sir?, iya (Seledio) man gisagpa" suma pa ni Pamador.

Gikan sa city stage, gibinaklid si Pamador ug gipugos pagdala sa opisina sa CSU sud sa daan nga city hall sa wa mailhing mga batos ni Seledio.

"Kuyawan ko sir, kaingon ko nga basig tiwasan ko ani nila, hantud karon kulbaan pako, lain gud ako paminaw" suma ni Pamador.

Dali naman nga nagpa blotter ang biktima nga si Perez sa police station 1 (PS1) ug niatubang niini si Seledio ug gikatakda nga mag abot pag usab sa PS1 karong adlawa.

Sa pagpauli ni Perez ug Seledio, laing duha ka biktima nga si Panta ug Tauban ang nidangop sa PS1 ug nag pa blotter batok gihapon kang Seledio.

Ang CSU nga si Panta nisugilon nga gisukmag ang iyang nawong sa maka upat nga higayon ni Seledio ug giparok pa ang ulo sa maka upat usab nga higayon.

"Hubog ma to siya, unya giingnan mi nga sige lang daw mi og katog" matod ni Panta.

Samtang ang biktima nga si Tauban nisumbong nga gisagpa usab siya ni Seledio.

"gi ingnan man ko niya nga ikaw nag unsa man ka diri? Unya mao to gisagpa ko niya og kalit" pasabot ni Tauban.

Alas 5 karong buntag gibuhian si Pamador gikan sa opisina sa CSU ug ulahi na nga naka pa blotter.

Si PSinsp. Rio Tan, hepe sa PS1 nagkanayon nga giabisohan niya ang mga biktima sa pagpa medical aron gamiton sa pag sang-at og kaso.

Wa pa usab makuha sa kapolisan ang giingong pistola kay ulahi na sila nakahibawo niini.

Sa karon, physical injuries ug serious illegal detention ang nahimong kalapasan ni Seledio.

PHOTOS: Ang biktima nga si Landy Pamador.