Sunog sa Linao, Ormoc City

ORMOC CITY- Usa ka panimalay sa Block 10, World Vision sa Barangay Linao ang nasunog karong ala una pasado sa hapon.

Ang maong panimalay iya sa usa ka ginganlan og Rosemarie Conesa, 45 kinsa didto sa eskwelahan sa iyang anak sa pagkahitabo sa sunog.

Suma pa ni Senior Fire Officer 3 Roel Wenceslao nga, electrical short circuit ang tinubdan sa kayo.

Ala 1:40 gi deklarar nga undercontrol ang kayo ug pagka ala 1:50 gideklarar kini nga fire out.

Ang kabomberohan nagka problema sa kagamay sa karsada.

"Masulod man atong fire truck pero ang problema ug simbako modako ang kayo, mabutang gyod sa alanganin ang truck, lisud man ang pag backing" matod pa ni Wenceslao.

Gisumpay sumpay nalang sa kabomberohan ang ilang mga hose pasidung sa sudlonon nga bahin diin nahitabo ang sunog.

"Mga 200 meters ni atong bana bana nga gilay-on sa hose nga among gisumpay sumpay kay lisud man jud" suma pa ni Wenceslao.

Wa namay sub out ug fire hydrant ang maong lugar nga kakuhaan og tubig sa kabomberohan.

Ang likod nga bahin sa balay dunay firewall diin nahimutang ang Petron Depot samtang sa isig ka kilid niini duna usab mga panimalay. Ang tuo nga bahin walay firewall samtang ang sa wa nga bahin dunay firewall pero dili kaayo habog.

"O sige pang kayo pag abot namo, delikado gyod og wa to madali. Pero pasalamat sab ta sa petron depot kay nakapasirit sila og tubig" dugang pa ni Wenceslao.

Giklaro ni Wenceslao nga walay namatay ug samdan sa hitabo.

Wa pa usab makakuha ang kabomberohan sa danyos sa maong sunog.

"Mao naman lang ako nabatian nga may nipaka unya nikayo na sa balay, mao to nga sigeg siyagit ako asawa nga tabang mo mao to nga binuboay dayun og tubig, wa na gani katuod ang uban og asa ang balde kay naratol nasab" matod ni Junior Teborcio Tanza, silingan ni Conesa.

Ang kabomberohan regular nga mobisita sa mga barangay aron sa pagtudlo kabahin sa pagpangandam ug paglikay sa sunog.