Gipatay sa kauban sud sa drug den

CEBU, Philippines - Patay ang usa ka tawo nga matud pa sa kapolisan nga gikan naghithit og shabu sa usa ka drug den sa Barangay Day-as ning dakbayan sa Sugbo pasado ala-una kagahapon sa hapon.

Ang biktima naila lang sa ngalan nga “Ligan” ang iyang address ug ang tinuod nga ngalan wa pa mahibaw-i sa kapolisan.

Matud pa ni SPO4 Alex Dacua nga si “Ligan” gipusil patay sa sulod sa drug den nga gikatahong gipanag-iya ni Leonidas Tura, 80.

Si Dacua mibutyag nga misugilon niya si Tura nga sa wala pa ang maong hitabo si Ligan kuyog sa duha ka mga tawo nagsuyop og shabu.

Apan human nila og suyop naglalisay ang duha sulod sa maong drug den ug pipila ka minutos ang milabay gipusil si Ligan sa usa sa duha ka lalaki nga kauban nilang nanuyop.

Nakaangkon og samad ang biktima sa atubangan ug likod nga bahin sa iyang lawas nga gidudahang maoy hinungdan sa iyang hinanali nga kamatayon.

Padayon pa ang imbestigasyon sa kapolisan labot sa kamatayon sa biktima ug sa pag-ila sa mipusil kaniya. (BANAT NEWS)

Source: philstar.com - Balita