Radaza nasagmuyo sa pagpanghilabot sa Cordova

CEBU, Philippines - Nasagmuyo si Lapu-Lapu City Mayor Paz Radaza paglambigit sa dakbayan sa Lapu-Lapu nga kinahanglang apil sa monitoron tungod sa cyber sex crimes.

Ang pamahayag ni Konsehal Angeles Gairanod sa lungsod sa Cordova sa mga news reports nga nag-ingong kinahanglang apil ang Lapu-Lapu City sa mopasar og resolusyon sa pag-ban sa mga "money transfers" sa pagdawat og bayad alang sa cyber pornography gikan sa gawas sa nasud.

Giawhag usab nila nga monitoron usab ang maong dapit kung wala bay nalambigit sa maong kalihukan.

"Una manghilabot sa laing lugar ang mga opisyal sa lungsod sa Cordova kinahanglan una niining limpiyohan ang ilang tugkaran," matud pang Radaza.

Matud pa sa mayor nga wala pa gani ma-implementar ug makakita sa resulta ang Cordova sa gipanday nila nga resolusyon bahin sa kampanya kontra cybersex nanghilabot na sila sa laing lugar.

Kanunay nga gipahimangnoan ni Radaza ang iyang mga opisyal sa barangay nga magmabinantayon sa ilang dapit batok niining matang sa krimen.

Hangtod karon, nagpadayon ang kamanduan sa tanang mga internet café kalabot sa curfew sa mga tinun-an ini’g kagabii ug ang pagdili sa mga bata nga manulod sa internetan panahon sa tingklase kung walay pagtugot sa ilang mga magtutudlo.(/EIM)(BANAT NEWS)

Source: philstar.com - Balita