Income sa mga barangay gusto ni Cortes nga mosaka

CEBU, Philippines - Mga bag-ong nanumpang barangay treasurers ug secretaries sa 27 ka barangay gihagit ni Mayor Jonas Cortes aron maninguhang mapadako nila ang ilang tinuig nga barangay income. Ang pagpanumpa gihimo sa miaging adlaw diha sa Mandaue City Sports and Cultural Complex nga gitambongan ni Cortes.

Sumala pa sa mayor ang pagsaka sa income sa mga barangay makatabang sa kakulang sa pundo alang sa mga barangay projects.

Giawhag nila sila nga susihon og maayo ang ilang mga hurisdiksyon pagpangita niadtong mga patigayon nga wa magbayad og tukmang buhis ug kadtong wala pa gyu’y mga permits. Kay pinaagi niini mahimong makakolekta pa og dugang buhis ang barangay. Sa pagkakaron, ang barangay Subangdaku ug Paknaan maoy dunay dako og natampo sa pag-usbaw sa income sa dakbayan tungod kay misaka man ang ilang tax collections.

Si Cortes miingon nga ang Subangdaku duna karoy P15 milyones ang tinuig nga income samtang ang Paknaan nga kaniadto duna ray tinuig nga income nga P8 milyones nahimo nang P12 milyones. Matud pa ni Cortes, pinaagi sa pagsaka sa tax collections mabulahan usab niini ang kabarangayan tungod sa mga proyektong mahimong gamitan sa maong kwarta. (BANAT NEWS)

Source: philstar.com - Balita