Cebu City wa kaayo maapektuhi ni Basyang

CEBU, Philippines - Wala g’yud makamugna og dakung kadaut sa dakbayan sa Sugbo ang bagyong Basyang kaniadtong Biyernes sa gabii.

Apan ang kadagkoan sa Local Disaster Risk-Reduction Management Office (LDRRMO) nahimangod sa ubang tagdumala og advertising agency nga wala motangtang sa ilang mga tarpaulin.

Si Alvin Santillana, operations officer sa LDRRMO, nakabantay nga daghang advertising agency nga wala g’yud motangtang sa ilang billboards nga ginama sa tarpaulin.

Matud ni Santillana nga dugay ra nila gipahimangnoan ang tagdumala og advertising agencies nga kun adunay magsingabot nga bagyo tangtangon dayon nila ang ilang billboard.

Ang LDRRMO nakadawat og report nga adunay usa ka balay nga nakasinati og kadaut tungod sa pagdahili sa yuta sa Barangay Kalunasan.

Laing pagdahili sa yuta didto sa Barangay Sinsin duol g’yud sa gym ug lima ka balay ang nakaangkon og ginagmay’ng kadaut. Laing usa ka balay naguba kay natumbahan sa naluka nga kahoy sa Barangay Lusaran.

Tungod sa kusog nga uwan, pipila ka dapit sa dakbayan sa Sugbo nalunopan sulod sa pipila ka oras dihang miawas ang tubig sa Lahing-Lahing Creek sa Barangay Mabolo; Parian Creek nga nakapalunop sa V. Gullas ug downtown area.

Nalunopan usab ang eskina Bonifacio ug Sikatuna tungod sa pagsuyla sa tubig-baha gikan sa gamay’ng sapa paingon sa T. Padilla river, ingon man ang kabahin sa Barangay Tejero ug ang atubangan sa Zapatera Elementary School sa dalan Sikatuna. (BANAT NEWS)

Source: philstar.com - Balita