NBA: TIWASON KARON O TABLAHON GIHAPON?

Duha lang ka butang ang gipaabot sa minilyon ka mga NBA fans nga mahitabo karong buntag. Una -- tiwason na ba kaha sa San Antonio Spurs ang series, 4-2 ug   ikaduha -- makatabla  kaha ang Miami Heat sa 3-3 aron pagpugos og Game-7?

"Pagdaog" karon sa duwa maoy bugtong tinguha sa duha ka kampo. Walay usa  kanila  gustong  mapilde ilabi na ang Heat.

Dinhi ning tungora, ang akong pangagpas nga dag-on na sa Spurs ang Game-6 ug ilang ipakita ang tanan nilang abilidad aron lang mapugngan ang Heat nga dad-on sa kinatumyang rota ang finals. Tungod kay pulos man sila maayong laki nga teams, dili na importante kun  kinsa ang mga superstars,  ang  mas importante kinsa ang maayong makaduwa tali kanilang duha sa Spurs ug Heat.

Karon ang panahon sa Spurs nga magsaulog sa ilang ikalimang korona sa NBA, samtang karon sab ang kahigayonan  sa Heat nga ipakita sa tibuok kalibotan nga kadtong ilang 66-win sa season ug 27-game winning streak dili   taghap, apan bunga  sa ilang mga paningkamot ug sa pagkalig-on nga team nga bisan unsang unos o bagyo, dili magkaguliyang.  Hinuon, magpabilin silang kalmado sa usa ka malisod nga pagsuway. Dili nato malalis hugot depensa maoy himuong sukdanan karon sa duwa, busa posibleng mogamay ang final score ug dinhi nakapabor gamay ang Spurs.     Niadtong Game-1 lang sa tibuok series didto sa Miami nga wala makaabot og 100 ang finals score sulod sa lima ka duwa, 92-88  ug ang tanang upat ka duwa pulos gyud milapas.

Kun gamay ang iskor, tilimad-on kini nga modaog ang Spurs, apan kun  daku dunay posibilidad nga modaog ang Heat gikan sa 10 ngadto sa 15 puntos. Kay sa atong tan-aw, ang enerhiya sa Spurs sa Game-5, mao sab gihapon nga matang sa duwa ang ibawos sa Heat karon.

Busa kun ang Heat igo lang maglabaw og singko puntos sa katapusang dos minutos, hayan modaog  ang Spurs og singko puntos sab.