Wa nay ikabayad sa labayana’g basura

CEBU, Philippines - Wala nay kwarta ang dakbayan sa Sugbo pangbayad sa paglabay niini og  basura ngadto sa landfill sa Barangay Pulog, Consolacion sa sunod buwan.

Kini human wala aprobahi sa konseho ang gipangayong dugang P137.8 milyones nga supplemental budget sa Department of Public Services aron ibayad sa tipping fee matag toneladang basura nga  ilang ilabay sa Consolacion.

Matud ni Engr. Rogelio Legaspi, OIC sa Garbage Collection Division sa siyudad kuwang g’yud ang pundo nga ilang gipangayo sa Annual Budget nga gigasto gikan sa Enero ngadto sa Abril 15. Ang siyudad mobayad og P700 matag toneladang basurang ilabay sa Consolacion. Kada adlaw kapin sa 300 ka tonelada nga basura ang ilabay sa maong pribadong landfill.

Apan si Konsehal Hanz Abella niduso lang unta sa konseho og dugang P50 milyones nga budget aron ibayad sa tipping fee nga adto kuhaon sa calamity budget sa nangaging katuigan.

Apan wa gihapon kini tugoti sa mga konsehal nga sakop sa Bando Osmeña Pundok Kauswagan (BOPK) ug nisugyot nga patun-an usa sa Committee on Budget and Management.

 Tungod sa managlahi nila nga argumento dunay gihimong botasyon apan napilde ang sakop sa Team Rama nga pabor unta niini. (BANAT NEWS)

Source: philstar.com - Balita