P.9M shabu nasakmit

CEBU, Philippines - Mokabat dul-an usa ka milyon ka pesos nga shabu ang nasakmit sa managlahing operasyon sa kapolisan kontra ilegal nga drugas. Pasado alas 10 kagahapon sa buntag nasikop sa kapulisan sa San Nicolas Police Station ang usa ka level 3 drug pusher ug ang iyang bayaw nga usa sa mga most wanted person sa maong police station sa Barangay Pasil ning dakbayan  tungod sa pagpamaligya’g drugas.

Ang mga nasikop naila nga sila si Jover Rosagaran, 24, kinsa maoy target  sa operasyon ug ang iyang bayaw nga si Ferns Villanueva, 24 kinsa dugay na usab gipangita sa Philippine Drug Enforcement Agency (PDEA-7) ug adunay pending nga warrant of arrest.

Sumala pa ni Senior Inspector Chuck Barandog, ang hepe sa San Nicolas Police nga kagahapon sa alas-9 sa buntag dunay mga residenteng nisumbong kanila nga namaligya og shabu si Rosagaran sa dapit. Tungod niini, dunay police poseur buyer ang nipalit kang Rosagaran og usa ka paketeng shabu ug dihang gitunol ang shabu, gidakop kini dayon.

Sa pagrekisa kaniya nakuha ang daghang shabu nga mikantidad og P350,000. Atol sa maong operasyon tayming nga didto sab diay nagpuyo sa balay ni Rosagaran si Villanueva hinungdan nga kini giapil og dakop sa kapulisan. Samtang sa lungsod sa Balamban usa ka lalaking sakay sa motorsiklo nga sulay pa unta nga mosibat sa checkpoint ang nakuhaan og daghang shabu sa national highway sa  Brgy. Buanoy.

Ang suspek  mao si Jerome Armecin, 28, taga Barangay Poblacion lungsod sa Sogod.

Nasakpan usab siyang way lisensya ug wa say napakitang rehistro sa motorsiklo. Sa pagrekisa kaniya, nakuhaan kini og walo ka dagkong putos sa gituohang shabu nga mikantidad og P470,000.

Samtang nadakpan sa mga sakop sa City Anti Illegal Drug Special Operation Task Group (CAIFSOTG)  sa Danao City Police Station ang gikatahapang  level 2 drug pusher ug nasakmitan kini’g P119,000 nga kantidad sa shabu. Ang nadakpan mao si Elfred Baclohan, taga Barangay Maslog sa maong dakbayan. Matud pa dugay nang gipanid-an ang illegal nga kalihokan ni Baclohan sa maong lugar hangtod nga si PO3 Fiel Restauro ug mga kauban mihimo sa maong buy-bust operation.

Gipalitan kini og P200 nga  shabu ug human sa transaksyon gidakop kini dayon sa mga polis ug sa pagrekisa sa iyang kalawasan nakuha ang dugang pang lima ka gagmay nga pakete ug usa ka dakong pakete nga shabu. Ang mga dinakpan pasakaan og kasong kalapasan sa Section 5 ug Section 11 sa Article 2 ubos sa Republic Act of 9165 o Comprehensive Dangerous Drug Act of 2002 ang ilang gipasaka batok niini. (BANAT NEWS)

Source: philstar.com - Balita