Brgy konsehal, laing 3 gikiha

CEBU, Philippines - Gipasakaan og kaso’ng child abuse ang usa ka konsehal sa barangay Basak-Pardo, dakbayan sa Sugbo kauban sa tulo ka residente nunot sa giingong pagmaltrato sa 14-anyos nga bata’ng lalake.

Si Konsehal Estang Batokan gipasanginlang hubog nga nanagmal sa bata sulod sa barangay hall niadto’ng Oktubre 3, 2014 alas 11 sa gabii.

Ang bata kauban sa usa ka Luigi Martizano gidala sa barangay hall sa duha ka trabahante sa usa ka mall human pasanginli nga nangawat og duha ka lighter

Lakip sa gikiha mao sila si Norberto Martizano, amahan ni Luigi; Kimwell Martizano, igsuon ni Luigi; ug Sulpicio Navarro, trabahante sa barangay.

Si Norberto gipasanginlang nisumbag sa ulo sa bata samtang si Kimwell ug Navarro gipasanginlang nituok, kumot ug sagpa sa nawong samtang gipugngan ang abaga sa bata.

Ang inahan sa bata ang nidangop sa kapolisan human nasayri ang panghitabo ug gipaubos sa psychological evaluation sa Women and Children Protection Center sa Vicente Sotto Memorial Medical Center, Department of Social Welfare and Development ug Women and Children Friendly Center.

 Gihimakak sa mga gireklamo ang pasangil.

Apan si Piskal Jill Ann Molleno Gealon nakakita og igo’ng hinungdan sa pagpasaka sa kaso ngadto sa korte. (BANAT NEWS)

Source: philstar.com - Balita