ORMOC CITY - Mayor Codilla, misugot na ipostpone usa ang pagpamalhin sa gatusan na pamilya sa duha ka purok sa Brgy. Cogon

ORMOC CITY- Gitugotan ni Mayor Edward Codilla ang gatusan ka mga pamilya sa Purok Dalia ug Rosal sa barangay Cogon ning dakbayan nga di lang usa mamalhin karong adlawa (Feb. 15, 2014) ngadto sa mga bunkhouse sa barangay Concepcion ning dakbayan.

Nasayran nga karon na untang adlawa pabalhinon sa kagamhanan ang mga pamilya ngadto sa mga bunkhouse apan ang uban wa pa maka andam ug buot nila nga hatagan lang unta sila og panahon sa pag preparar.

Busa ang Mayor niingon nga sa buwan sa Marso nalang magsugod sa pagpamalhin ang mga pamilya.

Gitataw usab sa Mayor nga mahuman na usab ang pag develop nga gihimo sa DPWH ngadto sa area nga nahimutangan niining mga bunkhouse.

Ang Mayor subling niingon nga good for 6 months lang ang pagpuyo sa mga pamilya niining mga bunkhouse gumikan kay dunay 50 ektaryang yuta ngadto sa barangay Liloan nga gidonar ang iyang asawa nga si Violy nga maoy tukoran og mga balay sa Tzu Chi Foundation alang niining mga pamilya nga magpuyo sa bunkhouse, gani duna usab plano nga butangan kini og kaugalingong simbahan ug skwelahan ingon man hospital.

Gisiguro naman sa Mayor nga dunay panginabuhian nga ihatag ngadto sa gatusan ka pamilya kay gani ang kining ilang mga mabiyaan nga panimalay sa purok Dalia ug Rosal hilabi na atubangan sa city hall gubaon kini ug tukoran og edipisyo ug ang Mayor niingon nga andam niyang pa trabahuon sa konstraksyon ang kadtong membro sa pamilya.

Gikatakda naman nga I turn over sa DPWH ngadto sa kagamhanan ang laing 24 ka bunkhouse didto sa barangay Can-untog sunod semana.