Tulo ka pushers, laing 3 nagsuyop sikop

CEBU, Philippines - Nasikop ang usa ka level 2 drug pusher kauban sa lain pa’ng duha ka suspek atol sa buy-bust operation sa City Intelligence Branch (CIB) sa Cebu City Police Office sa sitio Riverside, Santa Cruz, barangay Duljo Fatima pasado alas 10 sa nakalabay nga gabii.

Ang mga nasikop naila nga sila si Erwin Protacio, 30, alyas Pilay nga mao’y target sa kapolisan samtang lakip sa nadakpan sila si Joey Java, 25 ug Eduardo Labitad, 25, nga taga sitio Kaanking, barangay Toong.

Matud ni Supt. Romeo Santander, hepe sa CIB, nga gamit ang P200 nga buy-bust money nakapalit og usa ka gamay nga pakete ang asset dayun gisikop si Protacio.

Nakuha sa kapolisan ang 37 ka pakete sa gituohang shabu nga kantidad og P35,000; cash money nga P1,400 nga gituohang kinitaan sa ilegal nga negosyo. Si Santander mitug-an nga tayming nga nakahatud na og shabu ang suspek sa iya’ng mga kontak hinungdan nga gamay lang ang ila’ng nasakmit.

Gawas sa drugas nakuha sab sa kapolisan ang duha ka .22 revolver nga duna’y mga bala.

Samtang nadakpan ang tulo ka tawo nga nag-pot session sulod sa payag nga nahimutang sa barangay Poblacion, lungsod sa Carmen alas 6 pasado ang takna sa niagi’ng gabii.

Si Police Officer 3 Jerome Quimque sa Carmen Police Station niila sa nadakpan nga sila si Rolando Capoy, John Glenn Batuto ug Domini Buot, pulos hingkod nga nagpuyo sa mao’ng dapit.

Matud ni Quimque nga may tawag sa telepono sa ilang buhatan labot sa nag-pot session hinungdan nga ila’ng girespondehan ug naaktohan ang mga suspek nga nagsuyop.

Nasakmit sa kapolisan ang tulo ka gagmay’ng pakete sa shabu ug drug paraphernalia.  (BANAT NEWS)

Source: philstar.com - Balita