Senior citizen nag-pusher?

CEBU, Philippines - Nadakpan sa kapolisan ang usa ka tiguwang nga giingong drug pusher dihang naaktohan sa kapolisan nga mitunol kini og dakong putos nga pinaugang dahon sa marijuana ngadto sa usa ka lalaki.

Si Leonides Batoon Carl, 61, walay trabaho ug nagpuyo sa Barangay Looc, Danao gidakop sa mga polis kaniadtong Dominggo sa gabii. Gidakop si Carl sa mga polis nga gipangulohan ni P03 Komar Solomon.

Si P03 Nelson Pantoja miingon nga naghimo ang iyang mga kauban og operation sa tanan nga illegal nga kalihokan sa dakbayan.

Samtang nagpadayon ang kapolisan paglibot sa dakbayan, ilang nasigpatan ang tiguwang nga nagpahipi sa ngitngit nga bahin samtang nakigsulti sa wala hiilhing lalaki.

Nakabig ang pagtagad sa kapolisan sa gihimo sa tiguwang ug sa wala hiilhing kauban nga lalaki hangtod nga mitunol og kuwarta ang lalaki dayong dawat sa dakong putos. Si Leonedes ug ang lalaki dali nga gisita sa mga polis og wala makalihok sa ilang gibarogan apan sa ngadto-ngadto ang wala hiilhing lalaki mikalit pagdagan.

Ang senior citizen gidakop sa mga polis human masuta nga ang putos nga iyang gitonol sa lalaki adunay sulod nga laya nga dahon nga gitoohan nga pinaugang marijuana. (/RUB)(BANAT NEWS)

Source: philstar.com - Balita