Katabang gidakop sa amo mga alahas gikawat

CEBU, Philippines - Usa ka katabang ang gidakop sa amo tungod sa pagkawat sa iyang mga alahas nga mokabat og P100 mil niadtong Domingo sa gabii.

Ang gidakop mao si Rhodora Cortez, 42, human dunay nakitang resibo sa pawnshop diin giingong gipamrenda ang mga alahas sa agalon.

Ang misikop kaniya mao si Alberta Parel, 45, molupyo sa BHHA Busay, Nivel Hills sa barangay Busay ning dakbayan sa Sugbu.

Ang biktima unang mitaho sa Investigation and Detection Management Branch sa Cebu City Police Office niadtong Sabado tungod kay nawala ang iyang mga alahas.

Ang drayber niini mipahibalo kaniya nga duna kini nakit-an nga resibo sa usa ka pawnshop sa kwarto sa katabang.

Ang mga sakop sa Theft and Robbery Section daling mihimo og ocular inspection sa balay sa biktima ug nasuta nga didto pa ang uban nga mga alahas sa biktima sa kwarto sa maong maid.

Lakip sa narekober mao ang kwentas ug singsing sa biktima nga didto sulod sa lawak. Busa daling gidakop sa amo ang iyang maid ug gihatod ngadto sa buhatan sa kapolisan. (BANAT NEWS)

Source: philstar.com - Balita