Armas ug shabu nasakmit

CEBU, Philippines - Nasakmit ang armas ug shabu gikan sa usa ka tawo nga nadakpan sa kapolisan didto sa Sitio Tundan, Barangay Basak, Mandaue kaniadtong Domingo sa gabii.

Ang nadakpan mao si Melbert del Carmen Huerte, alyas Abay, 22, walay trabaho, taga Barangay Pagsabungan.

Si Senior Inspector Genilo Veraque, hepe sa kapolisan sa Presinto 3 sa Mandaue City Police Office (MCPO) maoy nangulo sa pagdakop sa suspek.

Ang kapolisan nakadawat og tawag sa telepono nga nagpahibalo nga may armadong lalaki nga nagsuroysuroy sa Sitio Tundan. Dihang ilang giadto, nakit-an nila ang tawo nga gihulagway sa nag-report.

Nakita sa mga polis nga may nagbagal sa iyang hawak maoy hinungdan nga dali kini nilang gisita ug gisakmit ang gidala niining armas nga kalibre 38 uban sa unom ka mga bala.

Ang suspek wala makapakita og papeles sa iyang armas. Dihang girekisa, nasakmit pa gayud ang usa ka gamay’ng plastik nga may sulod nga shabu.

Ang laing nadakpan mao si Harry Gargolio, 36, taga sitio Asinan, barangay Mantuyong,Mandaue. Nadakpan si Gargolio didto sa Sitio Kapusoan sa Barangay Cambaro alas 6 ang takna kaniadtong Domingo sa gabii.

Si Gargolio nadakpan sa kapolisan pinaagi sa buy bust operation nga ilang gihimo ug nasakmit nila ang usa ka deck nga shabu ug mark money nga gigamit sa ilang police decoy sa pagpalit.

Kadtong nakuhaan og armas pasakaan og duha ka kaso nga paghupot og armas nga walay lisensya ug illegal nga drugas. Si Gargolio ikiha usab og paglapas sa balaod kabahin sa drugas. (/RUB)(BANAT NEWS)

Source: philstar.com - Balita